Alexandru I (rusu: Алекса́ндр I Па́влович, transliterable como Aleksándr I Pávlovich, 12 d'avientu de 1777 (xul.), San Petersburgu – 19 de payares de 1825 (xul.), Taganrog[9]) foi emperador de Rusia de magar 1801, primer rei del zaratu de Polonia de magar 1815 y Gran Duque de Finlandia de magar 1809. Yera'l fíu mayor del emperador Pablu I y la emperatriz Sofía Dorotea de Württemberg.
Asocedió a so padre nel tronu dempués de qu'esti fora asesináu, y gobernó Rusia demientres el caóticu periodu de les guerres napoleóniques. Como príncipe, y nos primeros años del so reináu, usó davezu una retórica política lliberal, pero na práctica continuó les polítiques absolutistes de los sos predecesores. Entamó, nostante, delles reformes sociales menores nos sos primeros años de reináu, y tamién, a partir de 1803-4, importantes reformes educatives de sentíu lliberal, fundando y construyendo nueves universidaes. Nombró a Mijail Speransky, fíu d'un cura de pueblu, como ún de los sos conseyeros más cercanos, y sustituyó los Collegia (departamentos ministeriales creaos por Pedru el Grande en 1717) por un Conseyu d'Estáu col envís d'ameyorar la llexislación. Fizo tamién planes pa crear un parllamentu y mandar elaborar y firmar una constitución.
En política esterior camudó la so posición sobre Francia cuatro vegaes ente 1804 y 1812, banciando ente la neutralidá, la oposición y l'alianza. En 1805 xunióse a Gran Bretaña na Guerra de la Tercer Coalición escontra Napoleón, pero tres de sufrir dos grandes derrotes nes battales d'Austerlitz y Friedland, camudó les sos aliances, roblando'l tratáu de Tilsit (1807), pol que se xunía al Bloquéu Continental napoleónicu. Enfrentose a Gran Bretaña nuna pequeña guerra naval ente 1807 y 1812, y tamién con Suecia (1808-9) tras refugar esti país xunise al Bloquéu Continental. Alexandru y Napoleón teníen, nostante, diferencies importantes, especialmente no que cincaba al futuru de Polonia, y l'alianza desfízose en 1810. El mayor trunfu d'Alexandru produciose en 1812, tres rechazar la invasión napoleónica de Rusia, qu'estrozó l'exéercitu francés. Como miembru de la coalición vencedora escontra Francia consiguió territorios en Finlandia y Polonia, y llueu participó na formación de la Santa Alianza, alianza de los gobiernos absolutistes europeos pa suprimir los movimientos revolucionarios del continente, vistos polos monarques absolutos cristianos como amenaces inmorales al so llexítimu gobiernu. Nesi contestu, ayudó tamién a l'Austria de Klemens von Metternich a suprimir tolos movimientos nacionales y lliberales del so territoriu.
Na segunda metá del so reináu Alexandru foi volviéndose cada vegada más arbitrariu y reaccionariu y obsesionose cola esistencia de complots escontra elli. De resultes, acabó con munches de les reformes que ficiera primeru. Asina, espulsó a los profesores foriatos de les escueles, dando un xiru a la educación nún sentíu más relixosu y políticamente conservador[10]. Speransky dexó de ser el so asesor, y foi sustituyíu pol estrictu inspector d'artillería Alekséi Arakcheyev, que supervisó la creación d'asentamientos militares, un peculiar tipu de cuartel nel que los soldaos combinaben el serviciu militar col trabayu agrícola. Alexandru morrió de tifus n'avientu de 1825, mientres viaxaba pel sur del país. Nun dexó descendientes llexítimos, una y bones dos fíes que tuviera morrieran de neñes, y dengún de los sos hermanos quixo convertise n'emperador. Tres d'un periodu de gran confusión, nel que se produxo por exemplu la revuelta decembrista protagonizada por oficiales lliberales del exércitu nes semanes posteriores a la so muerte, foi asocedíu nel tronu pol so hermanu menor, Nicolás I.